Sinhala story Blog

අගෝස්තු 11, 2013

කිබිසිනි -අහිමි වූ මෝහයන්

Filed under: Uncategorized — arunishapiro @ 8:42 පෙ.ව.

ලීලා ආපහු එද්දී තාත්තා ඉස්තෝප්පු කාමරයේ සිටියේ නැහැ.

අත කරට ගියත් මකර තැල්ල ද ඇයගේ කරේ නොවීය. ගිය තැනක කොතරම් කාලයක් ගෙව්වත් ගිය වේලාවට ම ආපහු එන්න හැකියාව මෙවර අහිමි වී ඇත් ද? ඇය දොර හරිද්දී තාත්තා දොර ළඟ එහා පැත්තේ හිටගෙන තව පොඩ්ඩෙන් දොර වැදී ඔහු ඇදවැටෙන්නට ඉඩ තිබුණි. ඔහු තිගැස්සුන හැටි දුටු අම්මා හුන් අසුනෙන් නැඟිට තාත්තා වෙත දිවගෙන පැමිණියේ තාත්තාව අල්ලා ගන්නට.

මිස් සුරම්‍යා යටි තොලේ කොණක් දතින් හපමින් ඔවුන් දිහා කුතුහලයෙන් බලා සිටින්නීය.

“මිස් සුරම්‍යා මෙහෙ හොයාගත්තෙ කොහොම ද?”

“කෝ ලීලා ආපහු පුස්තකාලෙට එනකම් බලාන ඉඳලා මම වයසටත් ගියානෙ,” ඇය සිනාවෙමින් කියමින් පොත් මල්ලකින් පොත් දෙකක් සහ තෙල් කඩදාසියක එතූ කේක් කෑල්ලක් එළියට ගති. “මගේ උපන්දිනේට පුස්තකාලේ කට්ටිය කේක් ගෙඩියක් කැපුවා. මේ පැත්තෙ එන නිසා මම ලීලාට පුංචි කෑල්ලක් අරන් ආවා.”

“අයියෝ මේ දරුවා කරදර වෙලා තියන තරමක්,” අම්මා තාත්තාව පුටුවකට වත්තන් කරන ගමන් කියන්නීය. මවගේ මුහුණේ තිබි මනස්තාපය මිස් සුරම්‍යයාගේ පැමිණීමත් සමඟ පහව ගිහින් යැයි දුටු ලීලාට ද දැනුනේ සතුටකි.

“මෙන්න ලීලාගෙ පොත්. මේ ඔයාගෙ අළුත් කාඩ් එකට දාලා තියෙන්නෙ. මේ දිනය මතක තියාගෙන එදාට කළින් ආපහු ගේන්න.”

“ස්කාලට් පිම්පර්නල් .. අනික, අහිමි වූ මෝහයන් .. මේක ද අර ප්‍රංශයේ කතාව?”

“ඔව් මේක තමයි හෙන්රි බල්සැක් ලියපු කතා වලින් ඩැනියෙල් ඩ’ආර්තේස් සහ ලුසියන් කියන චරිත තියෙන එක. මං මුළු පොතම කියෙව්වා. මට හැබැයි ‘දුප්පත් ඥාතියෝ’ පොත මීට වඩා රසවත්.”

“ඒත් මේ යහළුවන් අතරෙ තිබිච්ච එකමුතුව කොහොම ද?” ලීලා ඇසුවාය.

“ඔයා පොතේ මුල හරිය විතරයි කියවලා තියෙ ..” වාක්‍යය අවසන් නොකර මිස් සුරම්‍යා ලීලා දිහා බලාගෙන නැවතත් තොල් හපන්නට පටන් ගෙන.

“අපි මේ කේක් කෑල්ල කපාගෙන තේ හදාගෙන එමු නේද?” ලීලා මෙහෙකාරිය වෙත හැරුනේ දැන්ම යන්න එපා කියන බැල්මක් මිස් සුරම්‍යා වෙත පාමින්.

“ආන්ටි කියවන්න කැමති පොත් මොනවා ද?” ලීලාගේ මව වෙත හැරී මිස් සුරම්‍යා අසයි.

“අනේ ළමයෝ මේ ලීලාගෙ තාත්තා තමා පොත් කියවන්න හපනා. මේ ලෙඩේ හැදෙන්න කළින් හරියට පොත් කියවනවා …”

“කෑලි හතරකට කපලා ඔයාට කෑල්ලක් තියාගෙන අනිත් තුන ගිහින් දෙන්න. තේත් හදන්න. මම ඉක්මණට එන්නම්,” යැයි මෙහෙකාරියගේ කනට කොඳුරා ලීලා දිවගියේ ඇයගේ නිදන කාමරයට. අමතක වෙන්න කළියෙන් ඇය සාර්ථක ගමනක විස්තර ලියුවේ එහි වූ සටහන් පොතේ.

කොරියාව, ජපන් හමුදාව, මන්සෙයි, ඉන්දුක් …ඇයගේ දැරිය

ආච්චි -කටේ දත් නැහැ

සැර රහක් තියෙන තේ කෝප්පයක්

ක්‍රිස්තියානි ඉන්දුක් විවාහ වෙලා සිටියෙ කුලීන කොරියන් පරම්පරාවකින් ආපු .. ලීලා ඔහුගේ නම මතක් කරගන්නට උත්සාහ කළාය … එයා මොන ආගමේ ද?

පුස්තකාල පොත් දෙක ඇය තැබුවේ කොපි පොත උඩින්. මිස් සුරම්‍යා සමහර විට ඒ කතාවත් දන්නවා ඇති. ලීලා ඉස්තෝප්පුවට යද්දී කේක් ඇල්ලූ තසිම ආපහු අරන් එන මෙහෙකාරිය ඇය වෙත පෑවේ සිනා පිරි මුහුණක්.

“බේබිට මං කෑල්ලක් අරන් තිබ්බා,” මෙහෙකාරිය හිමින් කීය, “චූටි කෑල්ලක් වුනාට රහයි.”

තමන්ට එපා යැයි කියන්නට කට ඇරිය ද මෙහෙකාරියගේ සතුටු මුහුණ අඳුරු කරන්නට අකමැත්තේ ඇය ඔළුව වනා එකඟ විය. “එහෙනම් මටත් එක්ක තේ හදන්න,” යැයි කියද්දී මෙහෙකාරියගේ සතුට ඇයගේ මුහුණේ තවත් ඉස්මතු විය.

අම්මා සහ මිස් සුරම්‍යා යෙදෙන කතාබහ තේරුම් බේරුම් කරගන්නට හදන ලෙසකින් තාත්තා ඔවුන් දිහා බලාගෙන සිටියි. ඔහු අවධානයක් දක්වන්නට යළි පටන් ගෙන ද?

“මට තවත් පොතක් තියෙනවා හොයා ගන්න,” ලීලාට කියැවුනේ නොහිතාම. “ජර්මනියෙ කතාවක් ..” ඇය තාත්තා දිහා බැලුවේ ඔහු මොනයම් ආකාරයකින් හෝ සම්මාදම් වේ යැයි බලාපොරොත්තුවෙන්. එහෙත් ඔහු ලීලා දිහා බැලුවේ වත් නැත. ඇය කියන්න ඇහුණු බවක් පෙන්නුවේ ද නැත.

“උමගක් හාරලා ස්ටාසි කියල කට්ටියක ගෙන් පැනලා යන්න හදන පවුල් වල එක එක වයසේ අය … ජර්මනියෙ,” ලීලා කියා ඉවර කළත් තාත්තා වෙතින් කිසිත් වෙනසක් දකින්නට නොතිබුණි.

“ස්ටාසි කියන්නෙ නැගෙනහිර ජර්මනියෙ හමුදාව. තාප්පෙ හදන්න කළින් ද?”

ලීලා උත්තරයක් දුන්නේ නැත. තාත්තා එහි දී කතාබහට සමත් වුවත් දැන් ඉන්නා තත්වය දකිද්දී ඉන්පසු තනිවම අපූරු ගමනක් ගිහින් කලබලයක විසඳුමක් අත්දැක ගන්නට ලැබීමෙන් දැනුනු සතුට ගිලි හී නොයා දී අල්ලා ගැනීම අසීරුය.

මෙහෙකාරිය තේ කෝප්ප රැගත් බන්දේසිය සමඟින් ඉස්තෝප්පුට ආ නිසා ලීලාගෙන් උත්තරයක් කිසිවෙක් බලාපොරොත්තු නොවූහ. ඔවුන් නිහඬව තම තමන්ගේ තේ කෝප්ප පානය කළහ.

“තේ සැර රහක් කරන්න ඉඟුරැ නෙමෙයි හැබැයි ඒ වගේ මොනා හරි දානවා ද?” ලීලාට ආයෙත් කියැවුනේ නොදැනුවත්වම.

“ජින්සෙන්,” අම්මා කීවාය. “ඔන්න ලීලලැයි තාත්තා දවසක් උස්සන් ආවා ඇඹරිලා ගිය අතු කෑල්ලක් වගේ එකක්. ජරා රහක් මට නම් දැනුනෙ. ඒත් මෙයා නම් කිව්වෙ සැර රහක් දැනෙනවා කියල තමයි, නේද?” අම්මා විමසුවේ තාත්තා වෙතට හැරෙමින්.

ප්‍රතිචාරයක් ලබාදෙන්න »

තවමත් ප්‍රතිචාර නොමැත.

RSS feed for comments on this post. TrackBack URI

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

WordPress.comහි නොමිලේ වෙබ්අඩවියක් හෝ බ්ලොග් සටහනක් සාදාගන්න.

%d bloggers like this: