Sinhala story Blog

ජූලි 21, 2013

කිබිසිනි -මස්කඩකාරයා මේ පවුල එක්ක තරහයි

Filed under: Uncategorized — arunishapiro @ 5:24 පෙ.ව.

තේ කෝප්පයට මොනවා දෝ එකතු කර ඇත.

මේ පළාතේ ඇත්තේ සීනි වෙනුවට ගම්මිරිස් දාලා තේ හදන සිරිතක් දැයි ලීලා සිතුවාය. එහෙත් ඇය තිත්ත කහට කෝප්පය බිංදුවක් වත් ඉතිරි නොකර බී අවසන් කළාය.

දැරිය ඉකිබිඳිල්ල නවතා ඇඟිල්ලක් උරමින් පැතලි කොට්ටය මත නින්දේ පසුවෙයි.

මැහැල්ල මොනවා දෝ මතුරමින් ගේ පුරා එහා මෙහා ඇවිදියි.

පාරේ සද්ද වලින් ඇහෙන්නේ දොරවල් ජනේල වසාගෙන හැංගිච්ච උදවිය නැවතත් එළි පහළියට බැස ඇති බවයි.

තමන් කුමක් හෝ කළ යුතු බව ලීලා දන්නීය. එය හනිකට කළ යුතු බවත් කල් දැමිය නොහැකි බවත් දැනුම් දෙන්නේ ඇයගේ දෙදරන හදවත.

“මේ බබා කාගේ ද?”

මැහැල්ල ලොඹු කටින් පැවසූ වදන් ලීලාට වැටහුනේ නැත. එහෙත් ඒ භාෂාව නොදන්නාකමක් නිසා නොවේ. දොර හැරිය ලීලා පාරට අඩිය තැබූ විට මැහැල්ල ද සාලය ඇතුලට එබිකම් කළ දැරිය තද නින්දේ පසුවන බව දැක ලීලා පසුපසින් පාරට බැස්සේය.

නිවසේ දොර අසලින් ම රංචු ගැසුන පිරිස් කිහිපයක් කඩ ලෑලි වල බඩු අත පත ගාන මුවාවෙන් කතාබහේ යෙදෙති. ලීලා ඔවුන් අතරට ගියේ තමන් විසින් කරන්නට තිබෙන කර්තව්‍ය ගැන යම් හෝඩුවාවක් ලබාගන්නට.

“ඒ ඉල්-හාන් ගේ මිනිපිරිය,” කාන්තාවක් කියන්නේ සුසුම් හෙළමිනි.

“පුතාට ක්‍රිස්තියානි කෙල්ලෙක් එක්ක විවාහ වෙන්න අවසර දුන්නට ඉල්-හාන් හොඳ පරම්පරාවකින් එන කුලීනයෙක්. හාපොයි කාලේ වෙනස් වෙලා තියෙන හැටි,” තවත් කාන්තාවක් සුසුම් හෙළන්නට එකතු වෙමින් කීවාය.

“ක්‍රිස්තියානි ද නැත්නම් බුද්ධාගමේ ද කියල බලන්න නෙමෙයි, ජපනා හැම කාන්තාවකගේ ම ඇඳුම් ගලවන්නයි පොලීසියට අරගෙන යන්නෙ.” තරුණයෙක් කීවේ දැඩි ආවේගයකින් දත්කූරු කමින්.

“අපි කොරියන් කිය කිය හැමදාම චීන්නුන්ට, ජපනුන්ට, රුසියානුවන්ට බයෙන් ඉන්න ද කියන්නෙ?!!!” ඔහු අසලට ආ තවත් තරුණයෙක් දැඩි හිත් වේදනාවකින් ඇසීය. වැඩිහිටියන් කිසිත් නොකීහ. ඔවුන් බියෙන් තැති ගත් ඇස් මහමග හැම අත යවමින් මේ කතාබහට කිසිවෙක් හෝ සවන් දෙන්නේ දැයි සොයා විපරම් කළහ.

“ඇය මන්සෙයි කියනවා කාට හරි ඇහිලා තියෙනවා ද?” ලීලාගේ හදවතින් නැඟ ආ අදහස මුවින් පිටවූයේ මොළයෙන් පිරික්සීමක් නැතිව.

“ගුරුවරියක් වුනාට ඇය වැඩි කතාබහක් නැහැ කිසි කෙනෙක් එක්ක,” කාන්තාවන් දෙදෙනාගෙන් අයෙක් කියද්දී අනෙකා හිස වනමින් එයට එකඟ වූවාය.

“පාඩුවේ ඉන්න ගුරුවරියක්,” දත්කූරු කෑ තරැණයා කීවේය.

“එයා පොළට එන්නෙ මහත්තයට මාළු කූරියෙක් අරන් යන්න,” එතැනට පැමිණි ලේ පැල්ලම් සහිත උඩ රෙද්දක් උනා එයින් අත් පිස දමමින් ඔවුනට එකතු වූයේ මාළුකඩකාරයෙකි. “අර කෑ ගහපු මස්කඩකාරයා ඒ පවුල එක්ක තරහයි. එයාගෙ ගෙදර වැඩකාරකමට විකුණපු පුංචි කෙල්ලෙක්ට අතවර කරද්දී මේ පවුල ඒ කෙල්ලව බේරාගෙන එයාලගෙ ගෙදර නවත්තා ගත්තට.”

“හාපෝයි බුදු හාමුදුරුවනේ,” කාන්තාවන් දෙදෙනා තරඟයට සුසුම් හෙලූහ. මැහැල්ල ලොඹු කටෙන් ඔවුන් සමඟින් එකඟත්වය පළ කර සිටියාය.

“අපි යමු පොලීසියට. මුළු ගමේ හැමෝවම එකතු කරගෙන. ඇය මන්සෙයි කියනවා අපට ඇහිලා නෑ කියල කියමු.” ලීලා කීවේ එය තමන් විසින් කළ යුත්ත යැයි හදිසියේ ම වැටහුනු පැහැදිලි අවබෝධයකින්.

ප්‍රතිචාරයක් ලබාදෙන්න »

තවමත් ප්‍රතිචාර නොමැත.

RSS feed for comments on this post. TrackBack URI

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

WordPress.comහි නොමිලේ වෙබ්අඩවියක් හෝ බ්ලොග් සටහනක් සාදාගන්න.

%d bloggers like this: