Sinhala story Blog

අප්‍රේල් 22, 2013

කිබිසිනි -මහන්සි නම් උඩට ගිහින් පොඩි විවේකයක් ගන්න

Filed under: Uncategorized — arunishapiro @ 9:17 පෙ.ව.

අඳුරු බිම් මාලයක පස් ගොඩක් මැද්දේ තාත්තා සහ ලීලා හිටගෙන.

“ලිනා, මහන්සි නම් උඩට ගිහින් පොඩි විවේකයක් ගන්න,” කණට කොඳුරා රහසින් පැවසූ අයෙක් ලීලාගේ අතේ වූ බාල්දිය ඉවත් කළේය. බාල්දියක් ඔසවා ගෙන සිටිනවා යැයි ලීලා දැක්කේ එවිට.

“… මහත්තයාටත් දැන් මහන්සි ඇති, දුවත් එක්ක ම විවේකයක් ගත්තොත් නේද?” පියාට අනෙක් පැත්තෙන් වූ අයෙක් ගැඹුරු එහෙත් හඬ බාල කරන ලද කටහඬකින් කියන ලදි.

තාත්තාගේ අතේ ද හිස් බාල්දියකි. ඔහු ලීලා දෙස බැලීය. ඇය කවුදැයි අඳුනාගත්තේ ය. ඔහුගේ දෑස් සතුටින් පිරී ගියේය. වහාම හේ වටපිට බැලීය. අනිත් අය අනුගමනය කරමින් කිසිත් කතාවක් නැතිව බාල්දිය වළක් හාරමින් ඉන්නා අය වෙත බාර දුනි. වළෙන් එළියට එන පස් ඉවත් කිරීම පියාගේ සහ ලීලාගේ කාර්යය බව ඔවුන් හනිකට අවබෝධ කරගත්හ.

“තාත්තා ..,” ලීලා කියන්න පටන් ගත්ත අවසන් කරන්නට ඇයට ඉඩක් නොලැබුණි.

“මට මහන්සි නෑ ..,” තාත්තා කටහඬ ඉතා පහත් හඬින් අවදි කළේ ලෙඩේ හැදෙන්නට පෙර තිබුණු උද්‍යෝගීමත් ගති ස්වභාවයෙන්. ඒත් ඔවුන් දෙදෙන කතාබස් කළේ සිංහලෙන් නම් නෙමෙයි. තාත්තා ඇසක් වසා ඉඟි කළේ තමනට කිසිත් කරදරයක් නැහැ ඒත් මෙතැන දී ප්‍රශ්න අහන්නට එපා යැයි කියන්නට.

තාත්තා ගෙන් අසා දැනගන්නට උවමනා කරුණු කන්දරාවකි. කොහෙන් පටන් ගන්න දැයි සිතාගත නොහැක්කේ ඇය මෙවැනි අවස්ථාවක් තමනට උදාවේ දැයි කිසිම ලෙසකින් නොසිතූ නිසයි. මේ කවුදෝ නොදන්නා කට්ටියක් නිසා ඇයි මා නිහඬ විය යුත්තේ යැයි ඇය මුරණ්ඩු ලෙසින් තාත්තා දෙස බැල්මක් එල්ල කළාය. එහෙත් ඔහු එය දැක්කේ නැත.

කාය ශක්තියක් කිසිම ලෙසකින් අඩු වී නොගිය ආකාරයෙන් තාත්තා වළෙන් උඩට එන පස් පිරුණ බාල්දි ඉවතට ගෙන ගොස් හළා දමා ආපසු හිස් බාල්දි වළේ ඉන්නා අයට බාර දෙයි. වළ ඇතුලේ වූ පන්දමකින් එන යාන්තම් එළියක් මිසෙක එහි වෙනත් එළියක් දැල්වුනේ නැත. තාත්තා හා ලීලා හැරෙන්නට තවත් දෙතුන් දෙදෙනෙක් ඔවුන්ට සහාය වෙති. කිසිවෙක් වැඩි කතාබහක නොයෙදුනහ. ඉඳහිට වචනයක් පිට වුවත් එය රහසින් කොඳුරන ලද්දකි.

නලාවක හඬ පැතිර ගියේ සියල්ලන්වම තැති ගන්වමින්. ලීලා තැති ගත්තේ හදිසියේම පැතිර ආ එහි සද්දයෙන්. එහෙත් අනිත් අය, තාත්තා ද ඇතුළුව එය අපෙක්ෂා කරමින් සිටි බවක් පෙන්වූහ. වළේ උන් කඩවසම් තරුණයන් දෙදෙනෙක් හනිකට එළියට පැන ගත්හ. වටේ උන් අය හනිකට බාල්දි සියල්ලම වළ ඇතුලට දමා, වළේ කට උඩින් ලෑල්ලක් දමා එය වසා දැමූහ. ඔවුන් වතුර බාල්දි, සිමෙන්ති ගෝනි හා ලී පතුරු එහි උඩින් සකස් කළේ කළින් එසේ කර හුරු පුරුදු බවින්. තත්පර කිහිපයක් යද්දී පස් හය දෙනෙක් එකතු වී කරන ප්‍රතිසංස්කරණ සිද්ධ වූයේ වළ ඇතුලේ නොව එහි අවට සේ දැක්වෙන්නට දර්ශනය වෙනස් කෙරිණ.

“අයියණ්ඩි ඔයා ඉන්නවා ද අහනවා,” කෙල්ලකගේ සුකොමළ කටහඬක් තරප්පු පේලියක් දිගේ ඇයගේ අඩි හැප්පෙන සද්දයත් සමඟ අවට බිත්ති වල දෝංකාරය දෙයි.

“මම මේ පොඩි වැඩක්,” ඔහු උත්තර දුන්නේ කළින් සකස් කරගත් ප්‍රතිචාරයක් කෙල්ලට නොව වෙනත් අසා සිටින්නෙකුට ඇහෙන්නට කියන ලෙසකිනි.

“ඔහුට එන්න කියන්න, අපිට ඔහු සමඟ කතා කරන්න අවශ්‍යයයි,” තරුණයෙකුගේ මවා ගත් ගාම්භීර කටහඬක් බිත්ති වල දෝංකාර දෙමින් ගලා එයි. අනෙක් කිසිවෙක් හුස්ම ගන්නා සද්දයක් හෝ පිට නොකරන උත්සාහයෙන් ඉන්නා බව ලීලාට වැටහුණි.

“අයියණ්ඩි, ඔයාට එන්නලු, ඔයා එක්ක කතා කරන්න අවශ්‍යයැයිලු,” කෙල්ල කළින් උච්චාරණය කළ සුකොමළ ගතියෙන් ම කීවාය. එහෙත් ඒ ගාණක් නොගෙන සේ පැවසෙන කෙල්ලගේ කටහඬේ දැඩි බියක් ඇත්තේ යැයි ලීලාට දැනිණ.

“තත්පරයක් දෙන්න, මගේ අතේ සිමෙන්ති,” තරුණයා කීවේය. උඩට කැඳවීම නුරුස්සන බවක් මෙවර මවා පාන්නට අවශ්‍ය නොවිණ.

ඔහු අනික් අය දිහා බැලීය. ඔවුන් ඔහු දිහා බලා හිස් වැනූහ. මුහුණ දෙන්නට යන්නේ කුමන අවදානමකට දැයි ඔවුන් සියල්ලම දන්නා සේ ය. තාත්තා ද ඔවුන් අතරට එකතු වී සිටියි. ලීලාට වෙන්නේ කුමක් දැයි නොපැහැදිලියි. තරුණයා හඬ නොනැඟෙන සේ දැඩි හුස්මක් ඉහළට ගත්තේය. ඔහුගේ උඩුකය හුස්මෙන් පළල් විය. ඉන්පසු හඬක් නැඟෙන සේ ලීයක් ඔසවා පස් නොමැති තැනක බිම අත හැරියේය. ඉන්පසු පන්දමත් රැගෙන කඩිමුඩියේ දුවන බවක් අඟවමින් තරප්පු පෙළ නැඟ්ඟේය.

ඔහු නොපෙනී ගිය පසු ලීලා තාත්තා දෙස හැරුනත් තාත්තා ඉතා යාන්තමින් වරක් දෙවරක් පමණක් අන්ධකාරයේ ඔළුව දෙපැත්තට වැනුවේ දැන් මුකුත් අහන්න එපා යැයි කියන්නට.

ප්‍රතිචාරයක් ලබාදෙන්න »

තවමත් ප්‍රතිචාර නොමැත.

RSS feed for comments on this post. TrackBack URI

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

WordPress.comහි බ්ලොග් සටහනක්.

%d bloggers like this: