Sinhala story Blog

ජූලි 15, 2010

අප ජීවත්වන්නෝ -11 කීරා! ඔබ කොහෙද?

Filed under: Uncategorized — sinhalashortstories @ 9:34 ප.ව.

ලෝකයේ වසනා කම්කරුවනි එක්වෙයව්!

දුම්රිය නැවතුම්පළෙහි පාට නොගෑ තාප්පවල ලියා ඇති එම වදන් දෙස කීරා බැලීය. තැනින් තැන සිමෙන්ති කැඩී ගොස් ඇති තාප්පය යම්කිසි චර්ම රෝගයකින් පෙළෙන්නාක් සේය. අළුත් රතු අකුරින් නව සටන් පාඨ එහි ලියා ඇත. කම්කරු පංතියේ ඒකාධිපත්වයට දීර්ඝායුෂ වේවා! අපිත් සමඟ නැත්තෝ අපිට එරෙහි වූවන්ය!

සටෙන්සිලයක් මතින් රතු තීන්ත ගා එම අකුරු ලියා තිබුණි. අකුරු වලින් බේරී රූරා පහළට වැටුණු තීන්ත පාරවල් සමඟින් තීන්ත වේලී ගොස් තිබුණි.

තරුණ ගැටයෙක් ඒ සටන්පාඨ ලියූ තාප්පයට හේත්තු වී සිටියේය. ලා පැහැති ඇස් වලට වැටෙන ලා පැහැති හිසකේ ඇති ඔහුගේ හිසමත තැලී පොඩි වූ බැටළුහම් තොප්පියක් හිරවුණි. අරමුණක් නැතිව බලා සිටි හෙතෙම සූර්යකාන්ත ඇට සපමින් කට කොණකින් එහි පොතු විසි කරන්නේය.

දුම්රියත් තාප්පයත් අතරින් ගමන්ගත් කාකි පැහැ කබා ඇඳගත්, රතු ලේන්සු පැළඳගත්, රැවුල් නොකැපූ, ඇරුණු කටවල් වලින් පිටවෙන හඬ උස් වූ සීලිමේ දෝංකාරය දෙන බූට් සපත්තුවල හඬින් මැකී යන සේ පා තබනා සොල්දාදුවන් මැදට කීරාව තල්ලු වී ගියාය. දම්වැලකින් ටින් කෝප්පයක් එල්ලුන, මළකඩ කෑ පටි සහිත පරණ බැරලයක “උණු කරන ලද වතුර” යයි සඳහන් විය. ඒ අසලින් විශාල දැන්වීම් පුවරුවක් කියා සිටියේ “කොළරාවෙන් ප්‍රවේසම් වන්න. උණු නොකළ වතුර බොන්න එපා” කියාය. ඉට ඇට පෑදී ඇටසැකිල්ලක් මෙන් වූ දඩාවතේ යන බල්ලෙක් වලිගය පසුපස කකුල් අස්සේ හංගාගෙන ආහාර සොයා කැසිකබලින් පිරි වේදිකාවේ බිම ඉව අල්ලයි. අවිගත් සෙබළුන් දෙදෙනෙක් හඬමින් දඟලන කාන්තාවක් ජනයා අතරින් ඇදගෙන යති. “සහෝදරයෙනි! මම කළේ නැහැ! සහෝදරයෙනි කොහෙද මා රැගෙන යන්නේ? හිතවත් සහෝදරයෙනි, දෙවියන්වහන්සේ පල්ලා, මම කළේ නැහැ!”

මඩ තැවරුණු දිගු සායවල් හා බූට් සපත්තු මැදින් බිම වැටුණු සූර්යකාන්ත ඇට වලින් හැලි පොතු හා සිගරට් කොට අතරින් හැලී විසිරී ගිය මෙනේරි මල්ලක් යළි එකතු කරන කාන්තාවක් මිනිස් කටහඬකින් ද නොවන, බුරන හඬකින් ද නොවන, ඒකාකාරී වූ හැඬුම් ස්වරයකින් ඉකිබිඳියි.

කීරා දිග ජනේල දිහා බැලුවාය. එයින් පිටත සුපුරුදු කන් පාරන ස්වරයෙන් වදිනා ට්‍රෑම් රථ සීනු හඬ ඇයට ඇසුණි. ඇයට සිනහවක් පහළ විය.

“අණදෙන නිලධාරියා” යයි රතු අකුරින් සඳහන් වූ දොරක් අබියස තරුණ සොල්දාදුවෙක් ආරක්ෂා සීරුවෙන් හිටගෙන සිටියි. කීරා ඔහු දෙස බැලුවාය. ඔහුගේ ඇස් කර්කශ විය. අව්වෙන් පැහැය වෙනස් වූ මුහුණේ ද, බයිනේත්තුව අල්ලා සිටි අත්ල ද, ඇරුණු කොලරයෙන් පෙනුන ගෙල ද පෙන්වූයේ ඔහු තුල වූ බිය සැක නැතිබවයි. කීරා ඔහුගේ හැඩරුවට කැමති වූවාය. ඔහුගේ ඇස් දිහා කෙළින්ම බැලූ ඇය ඔහු වෙත සිනාවක් පෑවාය. තමන් ඉදිරියේ ඇති අළුත් ලෝකයකට මුහුණ දෙන පියවර පටන් ගන්නා මේ මොහොත ඔහු හැඳිනගත්තා යයි ඇය සිතීය.

සොල්දාදුවාගේ නෙත් ඇයගේ නෙත් හා එක්වූයේ කිසිත් හැඟීමක් නැති වූ පුදුමයකිනි. ඇය වෙනතකට හැරුනේ මඳක් බලාපොරොත්තු සුන් වූ සිතකිනි. එහෙත් තමා බලාපොරොත්තු වූයේ කුමක්දැයි ඇය නොදත්තාය.

සොල්දාදුවා දැක්කේ ළමා තොප්පියක් දමාගත්, අමුතු ඇස් ඇති, අමුතු කෙල්ලක්ය. ඇය තනපටියක් ඇඳ නැතිව සූට් එක ඇඳ සිටීම ගැන නම් සොල්දාදුවා අකැමත්තක් නොදැක්වීය.

“කීරා!” ගලීනා පෙට්‍රොව්නාගේ කටහඬ දුම්රියපළේ අනිකුත් හඬවල් යටපත් කරමින් ඇසිණ. “කීරා! ඔබ කොහේද? ඔයාගේ පාර්සල් කෝ? ඔයාගේ පාර්සල් වලට මොකද වුනේ?”

කීරා නැවතත් තම පවුල ඔවුන්ගේ ගමන් බඩු එකතු කරගන්නට දඟලන දුම්රිය පෙට්ටියට ගොඩවූවාය. බඩුපොදි තුනක් රැගෙන යාමට ඇයට බාර වී තිබි බව ඇයට අමතක ව ගිහින්ය. කුළියට බර ඔසවන්නෝ දරාගත නොහැකි සුඛෝපභෝගීත්වයකි. ගලීනා පෙට්‍රොව්නා බඩු පොදිවලට අත ගහන්නට අර අඳිනා බර උසුලන පෝටර්ලාගෙන් ගැලවෙන්නට උත්සාහ දරයි. දිරා වැටුණු සොල්දාදුවන්ගේ කබා ඇඳගත් ස්ථුල බර ඔසවන්නෝ බඩු පෙට්ටි අවසරයක් නැතුව ඇද අල්ලා ගනිති. ඔවුන්ගේ සේවය ඔවුන් බලහත්කාරයෙන් දෙන්නට තැත දරති.

තමන්ගේ ඉතිරිව ඇති සියළු වස්තුව බඩුපොදි බැඳ එල්ලා ගත් අත්වලින් ආර්ගුනෝවා පවුල පෙට්‍රොගෑඩයට බැස්සහ.

Advertisements

ප්‍රතිචාර 4 »

  1. ලෝකයේ වසනා [මධ්‍යම පාංතිකයනි] එක්වෙයව්!

    එහෙමත් කිව්වද ???

    ප්‍රතිචාර විසින් stormcrow — ජූලි 16, 2010 @ 3:15 පෙ.ව.

    • stormcrow, පිටුව බලන්න නිකම් යන එනවා ද? නැත්නම් කියවනවා ද බලන්න එහෙම දාන්න හිතුන. ලෝකයේ වසනා කම්කරුවනි එක්වෙයව්! කියා නිවැරදි කළා ඔන්න. ඊ ළඟ දාපු “තඩි වඳකරන ව්‍යාපාරයට එක්වෙයව්!” නම් විහිළුවක් නෙමෙ, කතුවරිය ලියපු හැටිමයි.

      ප්‍රතිචාර විසින් sinhalashortstories — ජූලි 16, 2010 @ 8:33 ප.ව.

      • හැට ගනන් වල සිංහලයෙන් පළ වුනු ‘පාඨකයා’ කියන ඩයිජස්ට් සඟරාවක මෙහෙම විහිළුවක් තිබුනා.

        ඇමරිකාවේ රුසියානු තානාපති ගෙන් වතාවක් පත්තර කාරයෙක් ඇහුවලු ඇමරිකාවේ තිබෙන ප්‍රධාන අඩු පාඩුව හැටියට දකින්නේ මොකක් ද කියලා.
        තානාපති කිව්වලු, “රුසියාවේ නම් ඕනෑ තැනක පහසුවෙන් ගන්න උකුණන් වඳ කරන බෙහෙත් තියෙනව, මෙහේ එහෙම නැති එක ලොකු අඩු පාඩුවක්” කියලා.

        ප්‍රතිචාර විසින් stormcrow — ජූලි 17, 2010 @ 10:44 පෙ.ව.

      • stormcrow, රුසියානු තානාපතිගෙ කතාව අදටත් සත්‍යයකි. උකුණන්ට දමන බෙහෙත්වල තිබෙන විෂ නිසා පාමසිවල කවුන්ටරයෙ ගන්න නැහැ. ඇතුලෙන් ඉල්ලන්න අවශ්‍යයයි. උකුණන් නැති කරන්න ඔළුවට බෙහෙත් දාන්න ගිහින් දරුවන් නැතිවූ අයත් ඉන්නවා. ලංකාවෙන් පැමිණි ගායිකාවක් හිසකෙස් කළු කරන ඩයි ගාන්න ගිහින් මෙහෙදි අසාත්මික ප්‍රතිචාරයක් නිසා මරණයට පත්වුනා. සමහර බෙහෙත් පාවිච්චිය මෙහෙ නීතිවලින් දරදඬු වැඩි කියල කියන්නත් පුළුවන්.

        ප්‍රතිචාර විසින් sinhalashortstories — ජූලි 18, 2010 @ 10:21 ප.ව.


RSS feed for comments on this post. TrackBack URI

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

WordPress.comහි බ්ලොග් සටහනක්.

%d bloggers like this: